کراچی: پاکستانی اداکارہ ہانیہ عامر نے ایک بار پھر سوشل میڈیا پر اپنے مداحوں کی توجہ اپنی جانب مبذول کر لی ہے۔ اس بار ان کی توجہ کا مرکز ان کے بازو پر بنایا گیا نیا عربی ٹیٹو ہے، جو خود سے محبت اور اپنی ذات کو ترجیح دینے کا پیغام دیتا ہے۔
ڈرامہ سیریل “کبھی میں کبھی تم” سے بے پناہ شہرت حاصل کرنے والی ہانیہ عامر کا پاکستان کے علاوہ بیرون ملک بھی بڑا مداحوں کا حلقہ ہے اور وہ سوشل میڈیا پر کافی متحرک رہتی ہیں۔
میرے ہمسفر سے شہرت کی بلندیوں تک
ڈرامہ “میرے ہمسفر” میں ہالہ کے کردار کی ادائیگی نے ان کی مقبولیت میں مزید اضافہ کیا اور انہیں ملک کی نمایاں ٹیلی ویژن اسٹارز میں شامل کر دیا۔ اداکاری کے ساتھ ساتھ ہانیہ نے فیشن اور اسٹائل میں بھی اپنی منفرد پہچان بنائی ہے۔ ان کے لوازمات، سادہ مگر دیدہ زیب لباس اور بالخصوص پکسی کٹ ہیر اسٹائل نے متعدد بار مداحوں کی توجہ حاصل کی ہے۔
ٹیٹو ہانیہ کے ذاتی اسٹائل کا حصہ
ٹیٹو بھی ان کے ذاتی اسٹائل کا ایک نمایاں حصہ بن چکے ہیں۔ سوشل میڈیا پر شیئر کی گئی حالیہ تصاویر میں ان کے بائیں بازو پر کلائی سے کچھ اوپر بنایا گیا عربی ٹیٹو خاص طور پر نمایاں تھا۔
اس ٹیٹو میں عربی عبارت کندہ ہے جس کا ترجمہ “پہلے خود سے محبت کرو” بنتا ہے۔ یہ پیغام عام طور پر اس تصور سے منسلک کیا جاتا ہے کہ انسان کو دوسروں کے ساتھ تعلقات استوار کرتے ہوئے اپنے جذبات، ضروریات اور بہبود کو بھی اہمیت دینی چاہیے۔
مداحوں کا ردعمل
ہانیہ عامر کے اس نئے ٹیٹو کی تصاویر سوشل میڈیا پر تیزی سے پھیل رہی ہیں اور مداح اسے ان کے انداز کے عین مطابق قرار دے رہے ہیں۔ بہت سے صارفین نے اس پیغام کو سراہتے ہوئے کہا کہ خود سے محبت کی یہ بات ہر فرد کے لیے اہم سبق ہے۔
واضح رہے کہ ہانیہ عامر حال ہی میں ورلڈ چیمپیئن عثمان وزیر کی زیر نگرانی باکسنگ کی تربیت بھی شروع کر چکی ہیں، جس کی تصاویر نے بھی سوشل میڈیا پر خوب توجہ حاصل کی تھی۔
