پیرس کے مشہور عجائب گھر میں ملازمین کے مطالبات پر تنازعہ طویل ہوگیا
دنیا کے سب سے زیادہ وزٹ کیے جانے والے عجائب گھر، پیرس کے لوور میوزیم کے عملے نے بہتر کام کے حالات کے مطالبے پر اپنی ہڑتال دوبارہ جاری رکھی ہے۔ فرانس پریس ایجنسی (اے ایف پی) کو یونین ذرائع سے معلوم ہوا کہ پیر کے روز عملے کی ایک بڑی تعداد نے ہڑتال کے نوٹس کی تصدیق کی۔
عجائب گھر جزوی طور پر کھلا، مونا لیزا دیکھنے کا موقع برقرار
میوزیم انتظامیہ کے مطابق، عجائب گھر جزوی طور پر کھلا ہے جس میں “شاہکاروں کا راستہ” ترجیحی بنیادوں پر دستیاب ہے۔ اس راستے میں لیونارڈو ڈاونچی کی مونا لیزا اور وینس ڈی میلو جیسے عالمی شہرت یافتہ فن پارے شامل ہیں۔
لوور کی ویب سائٹ پر پیر کی صبح ایک نوٹس میں بتایا گیا تھا کہ “کھلنے کے اوقات میں خلل پڑ سکتا ہے اور کچھ گیلریاں غیر معمولی طور پر بند رہ سکتی ہیں۔”
تنخواہوں کے فرق اور عملے کی کمی پر احتجاج
سی جی ٹی یونین کے نمائندے کرسچین گالانی نے اے ایف پی کو بتایا کہ “ہڑتال کرنے والے عملے کی تعداد مکمل بندش کے لیے کافی نہیں ہے۔” انہوں نے کہا کہ اس سے قبل چار مواقع پر میوزیم مکمل طور پر بند کرنا پڑا تھا۔
یونینوں کے ایک مشترکہ بیان کے مطابق، 300 سے زائد ملازمین نے اجتماعی اجلاس میں یکمتفقہ طور پر 15 دسمبر سے جاری ہڑتال کو جاری رکھنے کا فیصلہ کیا۔ ملازمین کم عملے اور وزارت ثقافت کے دوسرے ملازمین کے ساتھ تنخواہوں کے فرق کے خلاف احتجاج کر رہے ہیں۔
معاشی نقصانات اور سیکیورٹی خدشات
کرسچین گالانی کے مطابق، “ملازمین کے ایک حصے کی تنخواہوں کے معاملے پر کوئی ٹھوس وعدہ نہیں کیا گیا ہے۔” انہوں نے بتایا کہ رسیپشن اور نگرانی کے شعبوں کے ملازمین کے معاملے میں کچھ پیش رفت ہوئی ہے۔
ہڑتال کے آغاز سے اب تک میوزیم کو چار بار مکمل طور پر بند کرنا پڑا ہے جبکہ تین دیگر مواقع پر جزوی طور پر کھولنا پڑا۔ جن دنوں ہڑتال نہیں ہوتی، وہاں بھی عملے کے اجلاسوں کی وجہ سے میوزیم کے کھلنے میں تقریباً دو گھنٹے کی تاخیر ہوتی رہی ہے۔
جنوری کے وسط میں، لوور انتظامیہ نے اندازہ لگایا تھا کہ اس سماجی تحریک کی وجہ سے کم از کم 10 لاکھ یورو کا مالی نقصان ہوا ہے۔
یہ تنازعہ اس وقت اور بڑھ گیا جب 19 اکتوبر کو لوور میوزیم میں 8 کروڑ 80 لاکھ یورو مالیت کے نوادرات کی چوری ہوئی تھی، جو اب تک برآمد نہیں ہو سکے۔ اس واقعے کے بعد سے میوزیم کی سیکیورٹی اور انتظامیہ پر سوالات اٹھائے جا رہے ہیں۔