اسلام آباد (اصل میڈیا ڈیسک) پاکستان میں 60 ہزار سے زیادہ فری لانسرز موجود ہیں۔ 2018ء کے مقابلہ میں فری لانسنگ کی آمدنی میں 42 فیصد اضافہ ہوا ہے۔
عالمی بینک اور فری لانسنگ کے اعدادو شمار کے مطابق 2018ء میں پاکستان میں فری لانسرز کی تعداد 60 ہزار سے زیادہ تھی جبکہ دی گلوبل گگ اکانومی انڈیکس کی رپورٹ کے مطابق پاکستان میں فری لانسرز کی تعداد میں نمایاں اضافہ ہو رہا ہے۔
رپورٹ میں کہا گیا ہے کہ 2018ء کے مقابلہ میں فری لانسنگ کے شعبہ سے حاصل آمدن 42 فیصد تک بڑھ چکی ہے اور صنعت میں نمایاں ترقی کے باعث دنیا کے دس بڑے ممالک میں پاکستان چوتھا بڑا ملک ہے۔
بھارت ساتویں اور بنگلا دیش آٹھویں نمبر پر ہے۔ رپورٹ کے مطابق پاکستان میں کام کرنے والے 57 فیصد فری لانسرز کی عمریں 25 تا 34 سال ہیں۔
عالمی بینک نے کہا ہے کہ امریکا، بھارت، بنگلا دیش اور فلپائن کے ساتھ ساتھ پاکستان میں فری لانسرز کی تعداد میں نمایاں اضافہ ہو رہا ہے۔
