اسلام آباد (اصل میڈیا ڈیسک) جمیعت علمائے اسلام کے سربراہ مولانا فضل الرحمان کے دھرنے کے لیے ملک کے دور دراز علاقوں سے بھی لوگ اسلام آباد پہنچے ہوئے ہیں۔ دھرنے سے ہٹ کر ان کی روزمرہ سرگرمیاں بھی دلچسپی کا سبب بنی ہوئی ہیں۔
پاکستانی دارالحکومت اسلام آباد میں مولانا فضل الرحمان اور اپوزیشن کی طرف سے دھرنا جاری ہے۔ دھرنے کا سب سے برا مطالبہ وزیر اعظم عمران خان سے استعفیٰ حاصل کرنا ہے۔ پاکستان پیپلز پارٹی، پاکستان مسلم لیگ نون اور اے این پی سمیت کئی دیگر چھوٹی جماعتیں بھی اس دھرنے میں مولانا فضل الرحمان کی حمایت کر رہی ہیں۔
سیاسی سرگرمیوں اور دھرنے کے سبب عوام کو پہنچنے والی تکالیف سے ہٹ کر اگر اس دھرنے میں شریک لوگوں کی سرگرمیوں کو دیکھا جائے تو اسے بالکل درست طور پر ‘پاکستان کی تاریخ کا سب سے معصومانہ دھرنا‘ کہا جا سکتا ہے۔
انگریزی میں اسی عنوان کے تحت پٹاری نامی ٹوئیٹر ہینڈل نے ایک ویڈیو شیئر کی ہے جس میں دھرنے میں شریک افراد کی مختلف ‘معصومانہ سرگرمیوں‘ کو دیکھا جا سکتا ہے۔
جمعیت علمائے اسلام کے دھرنے کے لیے پاکستان کے دور دراز علاقوں اور سبھی صوبوں سے لوگ شریک ہیں۔ دھرنے میں شریک ان افراد اور خاص طور پر نوجوانوں کے لیے تو یہ تفریحی سرگرمیوں کا ایک موقع بنا ہوا ہے اور یہ لوگ دلچسپ کھیلوں اور حرکتوں سے نہ صرف اپنا خون گرم رکھتے ہیں بلکہ ان کی یہ سرگرمیاں دیکھنے والوں کے لیے بھی تفریح کا سبب بنی ہوئی ہیں ۔ ایسی ہی کچھ سرگرمیوں پر مبنی ویڈیوز مختلف ٹوئٹر صارفین کی طرف سے شیئر کی گئی ہیں۔
اسلام آباد میں جاری دھرنے سے دھرنا دینے والوں کے مطلوبہ نتائج حاصل ہوتے ہیں یا نہیں لیکن کم از کم یہ توقع تو اب کی جا سکتی ہے کہ بہت سے ایسے لوگ اور خاص طور پر نوجوان جو پہلی مرتبہ اسلام آباد آئے ہیں، وہ واپس جا کر شاید اپنے سیاسی نمائندوں سے یہ سوال کرسکیں کہ انہیں کب وہ تفریحی سہولیات اور انفراسٹرکچر مل سکے گا جو اسلام آباد جیسے بڑے شہروں میں تو موجود ہے مگر ان کے علاقوں میں ان کا کوئی وجود نہیں۔
