کراچی : مسلم امہ کی کامیابی کا راز ہم آہنگی اور باہمی اتحاد میں مضمر ہے ، پاکستان کو فلاحی ریاست اور پرامن معاشرے کے قیام کیلئے حضورکی سیرت کو اپنانا ہوگا، صحابہ کرام کی عظیم قربانیوں سے دین ہم تک پہنچا ہے اس کی قدر کرنی چاہے ، اسلامی تعلیمات اورسیرت سرورکونین سے دوری کے باعث آج مسلمان دنیا میں اجتماعی طور پرذلت کا شکار ہے،ان خیالات کا اظہار وفاق المدارس مجلس عاملہ کے رکن رئیس وشیخ الحدیث مفتی محمد نعیم نے جامعہ بنوریہ عالمیہ میں میڈیا سے گفتگوکرتے ہوئے کیا۔ انہوںںے کہاکہ حضورصلی اللہ علیہ وسلم کی بعثت کا مقصد دنیا سے اندھیروں کا خاتمہ اور انسانیت کی فلاح وبہبودہے ، آپ صلی اللہ علیہ وسلم اور آپ کے صحابہ رضوان اللہ تعالی علیھم اجمین کی عظیم قربانیوں سے یہ دین ہم تک پہنچاہمیں اس کی قدر کرنی چاہیے،موجودہ دور میں مسلمانوں کی بڑی کمزوری ہے کہ ہم سرکار دوجہاں سے محبت کے دعوے کرتے ہیں مگر زندگی سرکارۖ کی مبارک سیرت کے مطابق بسر نہیں کررہے جس کی و جہ سے نہ صرف معاشرے پربرے اثرات پڑ رہے ہیں بلکہ ہماری دعوت و تبلیغ کے ثمرات بھی حاصل نہیں ہورہے اوراقوام عالم تک اسلام کا پرامن پیغام پہنچانے میں ہمیں دشواریوں کاسامنا ہے۔
انہوں نے کہاکہ اسلامی معاشرے کی تشکیل کے لئے ضروری ہے کہ مسلم امہ یک جان،ا یک قوم ہو کر باطل قوتوں کی سازشوں سے باخبر رہیں، مسلم امہ کی کامیابی کا راز ہم آہنگی، بھائی چارگی اور اسلام کے جھنڈے تلے جمع ہونے میں مضمر ہے، انہوں نے کہاکہ آج ہم نے سیرت النبیۖ کو اپنانے کے بجائے منانے پر زیادہ توجہ مرکوز کرلی ہے پورے سال سیرت سے بے خبر نبی صلی اللہ علیہ وسلم کی سنتوں کو چھوڑ نے میں کوئی عار محسوس نہیں کرتے ربیع الاول آتے ہی چراغان اور دیگر ایشیا میں لگ جاتے ہیں ، انہوں نے کہاکہ حضور صلی اللہ علیہ وسلم کی سیرت پر عمل سے ہی دنیا کے مسائل حل ہوسکتے ہیں ،انہوں نے کہاکہ حضور علیہ السلام کی فرنبرداری اور آپ کی سنت پر عمل کیا جائے اپنی خواہشاتِ نفسانی کے مقابلے میں نبی کریم صلی اللہ علیہ والہ وسلم کے لائے ہوئے دین کی پیروی کی جائے۔
