ابوظبی (اصل میڈیا ڈیسک) ٹی ٹین لیگ میں قلندرز نے مراٹھا عربینز کو 4 وکٹ سے شکست دے کر ایونٹ میں اپنا مسلسل چوتھا میچ بھی جیت لیا، سہیل تنویر کو عمدہ بولنگ پر مین آف دی میچ قرار دیا گیا۔
ابوظبی میں جاری ایونٹ میں پہلے مراٹھا عربینز نے بیٹنگ کی، اوپنر محمد حفیظ نے شاندار بیٹنگ کی، شعیب ملک کے ساتھ تیسری وکٹ کی شراکت میں 43 رنز بھی جوڑے۔
حفیظ نے تین چھکوں اور دو چوکوں کی مدد سے 44 رنز بنائے، شعیب ملک نے 23رنز اسکور کیے، مراٹھا عربینز کا اسکور پانچ وکٹ پر 101رنز رہا۔
سہیل تنویر نے 22 رنز کے عوض تین وکٹیں حاصل کیں۔ جواب میں قلندرز نے ہدف 9ویں اوور میں حاصل کرلیا۔
شرجیل خان نے 28، بین ڈنک نے 26 اور کپتان سہیل اختر نے 20رنز بنائے، ایونٹ میں قلندرز کی ٹیم اپنا مسلسل چوتھا میچ جیتنے میں کامیاب ہوئی ہے۔
