کیلیفورنیا یونیورسٹی، رِورسائیڈ کی ایک ڈاکٹریٹ طالبہ نے آسٹریلیا میں پودوں پر گزارہ کرنے والے کیڑوں کی ایک نئی نسل کو عالمی شہرت یافتہ گلوکارہ ٹیلر سوئفٹ کا نام دے دیا ہے۔ سارہ شروڈر، جو اس تحقیق کی شریک مصنفہ ہیں، نے جرنل Insect Systematics and Evolution میں شائع ہونے والی ایک مطالعه میں بارہ نئی اقسام کے کیڑوں کی تفصیل پیش کی ہے۔
نئی نسل کا نام Swiftiephylus رکھا گیا
ان میں ایک نئی نسل کو Swiftiephylus کا نام دیا گیا ہے، جو ٹیلر سوئفٹ کے مداحوں کے لیے استعمال ہونے والی اصطلاح “سوئفٹیز” سے ماخوذ ہے۔ اس نسل میں چار اقسام شامل ہیں جن کے لاطینی نام گلوکارہ اور ان کے البمز کی طرف اشارہ کرتے ہیں:
- Swiftiephylus taylorae
- Swiftiephylus amator
- Swiftiephylus intrepidus
- Swiftiephylus poetorum
کیڑوں اور گلوکارہ کے درمیان مماثلت
سارہ شروڈر کے مطابق ان کیڑوں میں اپنی پسندیدہ فنکارہ سے ایک ہلکی سی مماثلت پائی جاتی ہے۔ یونیورسٹی کے ایک بیان میں انہوں نے کہا، “ٹیلر سوئفٹ کی پہچان ان کے سنہرے بال اور سرخ ہونٹ ہیں۔ یہ کیڑے ہلکے زرد رنگ کے ہیں جن پر سرخ دھبے موجود ہیں۔ میں نے مضمون میں انہیں ‘سنہرے بالوں والے’ کے طور پر بیان کیا ہے۔”
یہ کیڑے اپنے نام کی باضابطہ منظوری سے بہت پہلے جمع کیے جا چکے تھے۔ نمونے 1995 سے 2004 کے درمیان اکٹھے کیے گئے تھے۔ سارہ شروڈر اور ان کی شریک مصنفہ کرسٹیانے ویراوش، جو کیلیفورنیا یونیورسٹی میں انٹومولوجی کی پروفیسر ہیں، ان کیڑوں کی درجہ بندی اور تفصیل کی ذمہ دار ہیں۔
ٹیکسونومی کی اہمیت پر زور
ڈاکٹریٹ طالبہ کے مطابق ٹیلر سوئفٹ سے متاثر یہ نام خاص طور پر ٹیکسونومی کی اہمیت کو اجاگر کرنے میں مددگار ثابت ہو سکتے ہیں، جو ایک سائنسی شعبہ ہے جس میں انواع کی شناخت اور درجہ بندی شامل ہے۔
انہوں نے کہا، “اگر ہم انواع کی تفصیل نہیں بتاتے تو ہمیں ان کے وجود کا علم نہیں ہوتا اور ہم ان کا تحفظ نہیں کر سکتے۔ ان انواع کو ٹیلر کا نام دینا سائنسی تحفظ کے شعبے کو خراج تحسین پیش کرنے اور اس نامعلوم تنوع کی طرف توجہ دلانے کا ایک ذریعہ ہے۔”
انسانوں کے لیے نقصان دہ نہیں
ابتدائی جائزے میں یہ ٹیلر سوئفٹ کیڑے گلوکارہ کی ساکھ کو کوئی نقصان پہنچاتے نظر نہیں آتے۔ انہیں انسانوں یا جانوروں کے لیے نقصان دہ نہیں سمجھا جاتا اور یہ اپنی زیادہ تر زندگی جن میزبان پودوں پر گزارتے ہیں، انہیں نقصان پہنچانے کے لیے مشہور نہیں ہیں۔
واضح رہے کہ یہ آسٹریلوی کیڑے پہلی مخلوق نہیں جنہیں امریکی اسٹار کا نام دیا گیا ہے۔ سن 2022 میں ٹینیسی کے ایک جنگل میں دریافت ہونے والے بھورے اور نارنجی رنگ کے ایک ہزار پاؤں والے کیڑے کو بھی اس کے محقق نے Nannaria swiftae کا نام دیا تھا، جو خود ٹیلر سوئفٹ کے بڑے مداح ہیں۔
