وائٹ ہاؤس (اصل میڈیا ڈیسک) امریکی صدر ڈونلڈ ٹرمپ نے وائٹ ہاؤس میں کورونا وائرس کے پھیلنے کے متعلق تشویش کو مسترد کرتے ہوئے کہا ہے کہ نائب صدرمائیک پینس کے ٹیسٹ نیگیٹیو پائے گئے ہیں۔
عالمی سطح پر کورونا وائرس سے متاثرین کی تعداد بیالیس لاکھ سے بھی زیادہ ہوگئی ہے جبکہ دو لاکھ 87 ہزار سے زیادہ افراد اب تک اس وبا سے ہلاک ہو چکے ہیں۔
سب سے زیادہ ہلاکتیں امریکا میں ہوئی ہیں جہاں بارہ لاکھ سے زائد لوگ کووڈ 19 سے متاثر ہوئے ہیں اور اب تک 80 ہزار سے زیادہ ہلاک ہو چکے ہیں۔
جرمنی میں معروف سائنسی ادارے رابرٹ کوخ انسٹیٹیوٹ نے ملک میں کورونا وائرس سے متاثرین کے 933 مزید کیسز کی تصدیق کی ہے۔
ایران میں حکام نے منگل 12 مئی سے مساجد کو عارضی طور پر کھولنے کا فیصلہ کیا ہے تاکہ ماہ رمضان میں لوگ عبادت کر سکیں۔
جرمنی میں رابرٹ کوخ انسٹیٹیوٹ کے مطابق گزشتہ 24 گھنٹوں میں 933 مزیدافراد میں کووڈ 19 کی تشخیص ہوئی ہے اور اس طرح ملک میں کورونا وائرس سے متاثرین کی کل تعداد 170,508 تک پہنچ گئی ہے۔گزشتہ روز یعنی پیر 11 مئی کو 357 نئے کیسز سامنے آئے تھے اور اس لحاظ سے یہ ایک بڑا اضافہ ہے۔ سرکاری اعداد و شمار کے مطابق گزشتہ 24 گھنٹوں میں کورونا وائرس سے متاثرہ 116 مزید افراد ہلاک ہوئے اور اس طرح جرمنی میں اب تک 7533 افراد کی کووڈ 19 سے موت ہوچکی ہے۔
جرمنی نے لاک ڈاؤن کے تحت عائد بندشوں میں نرمی کرنے کا فیصلہ کیا ہے اور بعض حلقوں کی جانب سے کورونا وائرس کی وبا کی دوسری ممکنہ لہر کے بارے میں خدشات ظاہر کیے جا رہے ہیں۔
وائٹ ہاؤس میں کام کرنے والے دو سینئر افسران میں کورونا وائرس کی تصدیق ہونے کے بعد حکام نے تمام اسٹاف کو ماسک پہننے کی ہدایت جاری کی ہیں۔ اس کا مطلب یہ ہے کہ وائٹ ہاؤس میں کام کے دوران ‘ویسٹ ونگ’ کے تمام ملازمین کو ماسک پہننا لازمی ہوگا۔ ویسٹ ونگ میں ہی صدر ٹرمپ کا دفتر ہے۔ لیکن پریس بریفنگ کے دوران صدر ٹرمپ نے وائٹ ہاؤس کے حوالے سے ظاہر کی جانے والی تشویش کو مسترد کر دیا اور کہا کہ نائب صدر مائیک پینس کی جانچ نیگیٹیو آئی ہے۔
جرمنی نے لاک ڈاؤن کے تحت عائد بندشوں میں نرمی کرنے کا فیصلہ کیا ہے اور بعض حلقوں کی جانب سے کورونا وائرس کی وبا کی دوسری ممکنہ لہر کے بارے میں خدشات ظاہر کیے جا رہے ہیں
پیر کی شام کو وائٹ ہاؤس کی یومیہ بریفنگ میں بھی اس وقت ڈرامائی صورت پیش آئی جب صدر ڈونلڈ ٹرمپ صحافیوں کے سوالات کے جوابات دیے بغیر اچانک پریس کانفرنس چھوڑ کر چلے گئے۔ ورجینیا کی چینی نژاد صحافی ویجاجیانگ نے صدر سے سوال پوچھا کہ آخر ایک ایسے وقت جب ہر روز سینکڑوں امریکی شہری ہلاک ہورہے ہیں، وہ اس بات پر بار بار کیوں زور دیتے ہیں کہ امریکا کووڈ 19 سے لڑائی میں دوسرے ممالک سے بہتر کر رہا ہے؟ اس پر ٹرمپ نے جواب دیا، ”ہلاک تو ہر جگہ ہو رہے ہیں، شاید یہ سوال آپ کو چین سے پوچھنا چاہیے۔ مجھ سے مت پوچھیے چین سے یہ سوال پوچھیے۔”
جب جیانگ نے کہا کہ آپ یہ خاص طور پر مجھ سے کیوں کہہ رہے ہیں تو ٹرمپ نے کہا، ”جو بھی ان سے ایسا سوال کرے گا اس کو وہ یہی جواب دیں گے۔” اس کے بعد صدر نے دوسرے افراد سے سوال پوچھنے کو کہا تاہم اس کے فوراً بعد ہی وہ اچانک پریس کانفرنس چھوڑ کو چلے گئے۔
جنوبی کوریا میں بھی گزشتہ 24 گھنٹوں میں 27 مزید نئے کیسز سامنے آئے ہیں اور اس طرح متاثرین کی مجموعی تعداد 10936 ہوگئی ہے۔ جنوبی کوریا میں اب تک مجموعی طور پر 258 افراد ہلاک ہوئے ہیں۔
اس دوران فرانس نے سینٹرل امریکا میں پھنسے تقریباً 150 یورپی شہریوں کو نکال کر خصوصی پرواز سے یورپ پہنچا دیا ہے۔ اس میں 57 فرانسیسی شہریوں کے ساتھ ساتھ 18 جرمن بھی تھے۔ اس کے علاوہ اسپین اور اٹلی جیسے یوروپی ممالک کے افراد شامل ہیں۔ اس طرح اور بھی ایسے پھنسے افراد کے لیے بدھ 13 مئی کو ایک فلائٹ پرواز کے لیے تیار ہے۔
چین میں بھی لاک ڈاؤن میں تیزی سے نرمی کا آغاز ہوگیا ہے جہاں گزشتہ 24 گھنٹوں میں صرف ایک ہی کیس سامنے آیا ہے۔ بیجنگ میں مڈل اسکول کھل گئے ہیں اور طلبہ کا اسکول میں آنا جانا جاری ہے۔
کار بنانے والی معروف کمپنی ٹیسلا نے امریکی ریاست کیلفورنیا میں اپنی فیکٹری کو کھول دیا ہے۔ گر چہ ریاستی حکومت نے لاک ڈاؤن میں نرمی کر دی تھی تاہم مقامی انتظامیہ نے کار کے کارخانے نہ کھولنے کا فیصلہ کیا تھا لیکن ٹیسلا نے اس فیصلے کو عدالت میں چیلنج کرتے ہوئے فیکٹری میں اپنا کام کاج شروع کر دیا ہے۔
