لندن میں برٹش ایشین ٹرسٹ کے عشائیے میں پاکستانی اداکارہ کی شاہ چارلس سے ملاقات
لندن: پاکستانی سپر اسٹار ماہرہ خان نے شاہ چارلس کی جانب سے ان کے فلاحی ادارے، برٹش ایشین ٹرسٹ کے ذریعے پاکستان میں ذہنی صحت کے اقدامات کی حمایت کرنے پر ان کی تعریف کی ہے۔
شاہی سرپرستِ اعلیٰ، شاہ چارلس نے لندن کے پیننسولا ہوٹل میں منعقدہ برٹش ایشین ٹرسٹ کے سالانہ عشائیے اور استقبالیہ میں 300 سے زائد مہمانوں کے ساتھ شرکت کی۔
ذہنی صحت کے بارے میں بات کرنے میں بھی لوگ شرم محسوس کرتے ہیں، ماہرہ خان
پاکستانی اداکارہ نے لندن میں برٹش ایشین ٹرسٹ کے سالہ عشائیے شرکت کے بعد میڈیا سے گفتگو کی، جہاں انہوں نے شاہ چارلس سے ملاقات کی اور پاکستان میں ذہنی صحت سے متعلق آگاہی کی اہمیت پر بات کی۔
برٹش ایشین ٹرسٹ کے ساتھ بطور ذہنی صحت سفیر وابستہ ماہرہ خان نے کہا کہ جیو ٹی وی اور جنگ گروپ کے ساتھ پاکستان میں ذہنی صحت کے مسائل پر ادارے کا کام انتہائی اہم ہے۔
ماہرہ خان نے کہا، “لوگ آج بھی ذہنی صحت کے بارے میں بات کرنے میں شرم محسوس کرتے ہیں۔ وہ کہتے ہیں کہ ہم ماہرِ نفسیات کے پاس کیوں جائیں، ہم تو پاگل نہیں ہیں۔ لفظ ‘پاگل’ استعمال ہی نہیں ہونا چاہیے۔ اس مسئلے پر آگاہی پیدا کرنا بہت ضروری ہے۔”
انہوں نے کہا کہ ذہنی بیماری کو بھی دیگر طبی بیماریوں کی طرح ہی سمجھنا چاہیے۔ “جس طرح کینسر اور جوڑوں کا درد بیماریاں ہیں، اسی طرح ذہنی صحت کے مسائل بھی بیماریاں ہیں،” ان کا کہنا تھا۔
شاہ چارلس کی مسلسل حمایت پر ماہرہ خان کا شکریہ
ماہرہ خان نے برٹش ایشین ٹرسٹ کی مسلسل حمایت پر شاہ چارلس کی تعریف کی۔
انہوں نے کہا، “یہ ایک بڑی بات ہے کہ شاہ چارلس برٹش ایشین ٹرسٹ کی تقریبات میں شرکت کرتے ہیں۔ انہیں معلوم تھا کہ میں ذہنی صحت کی سفیر ہوں۔”
اس تقریب میں برطانوی ایشیائی کمیونٹی کی اہم شخصیات، فنکاروں، مخیر حضرات اور جنوبی ایشیا میں ٹرسٹ کے فلاحی کاموں کے حامیوں نے شرکت کی۔
خواتین پر تشدد کے خلاف مردوں کو آواز اٹھانی ہوگی، ماہرہ خان کا زور
وسیع تر سماجی مسائل پر بات کرتے ہوئے ماہرہ خان نے کہا کہ خواتین کے خلاف ہراسانی اور تشدد کو ہرگز برداشت نہیں کرنا چاہیے۔ انہوں نے کہا کہ مزید مردوں کو سامنے آکر خواتین پر تشدد کے خلاف مؤقف اختیار کرنا ہوگا۔
شاہ چارلس برٹش ایشین ٹرسٹ کے شاہی سرپرستِ اعلیٰ ہیں، جو تعلیم، روزگار، بچوں کے تحفظ، ماحولیات اور ذہنی صحت جیسے شعبوں میں کام کرتا ہے۔
تقریب کے مہمانوں میں میزبان سنجیو بھاسکر او بی ای، ڈیم میرا سیال، ماہرہ خان، کونی حق، کنال نیئر، پریا کالیداس، گورندر چڈھا، نٹی بوائے اور نہال آرتھنائیکے شامل تھے۔ اس شام میں بین الاقوامی ریکارڈنگ آرٹسٹ جے شان کی خصوصی پرفارمنس بھی پیش کی گئی۔
برٹش ایشین ٹرسٹ کے چیف ایگزیکٹو، ہیتن مہتا او بی ای نے کہا: “ہم اپنے شاہی سرپرستِ اعلیٰ، شاہ چارلس کی ٹرسٹ کے کام میں مسلسل دلچسپی کے لیے شکر گزار ہیں۔ برٹش ایشین ٹرسٹ کے لیے ان کی گہری اور دیرینہ حمایت ہمارے عزائم کے لیے تحریک کا ذریعہ ہے۔ آج رات، ہم جنوبی ایشیا میں برطانوی ایشیائی ڈائسپورا اور اپنے وسیع تر شراکت داروں کی وابستگی اور سخاوت سے ممکن ہونے والے غیر معمولی اثرات کا جشن بھی منا رہے ہیں۔”
اس تقریب نے برٹش ایشین ٹرسٹ کے لیے دس لاکھ پاؤنڈ سے زائد کی رقم جمع کی۔
