وفاقی بجٹ: سرکاری ملازمین کی تنخواہوں اور پنشن میں 7 فیصد اضافے کی تجویز
اسلام آباد: وفاقی حکومت نے مالی سال 2026-27 کے بجٹ میں سرکاری شعبے کے ملازمین کی تنخواہوں میں 7 فیصد اضافے کی تجویز پیش کی ہے۔ مسلم لیگ (ن) کی قیادت میں مخلوط حکومت نے ریٹائرڈ سرکاری ملازمین کی پنشن میں بھی 7 فیصد اضافے کی سفارش کی ہے۔
یہ اعلان وفاقی وزیر خزانہ محمد اورنگزیب نے جمعہ کو قومی اسمبلی میں مالی سال 2026-27 کے بجٹ تقریر کے دوران کیا۔ اسپیکر ایاز صادق کی زیر صدارت اجلاس میں وزیر خزانہ نے کہا کہ “یہ بجٹ ایسے وقت میں پیش کیا جا رہا جب پاکستان نے اپنے عوام اور دنیا کی نظر میں ایک ایسے ملک کا مقام حاصل کر لیا ہے جس کی آواز سنی جاتی ہے اور جس کی دوستی کی خواہش کی جاتی ہے۔”
کم از کم اجرت میں 10 فیصد اضافے کی تجویز
تنخواہوں اور پنشن میں اضافے کے علاوہ، وفاقی حکومت نے کم از کم اجرت میں 10 فیصد اضافے کی بھی تجویز دی ہے۔ اس اقدام کا مقصد مہنگائی کے اثرات کو کم کرنا اور کم آمدنی والے طبقے کو ریلیف فراہم کرنا ہے۔
تنخواہ دار طبقے کے لیے انکم ٹیکس میں ریلیف
بجٹ دستاویزات کے مطابق، حکومت نے تنخواہ دار افراد کے لیے چار مختلف سلیبز میں انکم ٹیکس میں ریلیف کی تجویز پیش کی ہے اور اس طبقے پر عائد سرچارج کو ختم کرنے کا اعلان کیا ہے۔ فنانس بل میں ٹیکس سلیبز کی تنظیم نو کے ذریعے تنخواہ دار ٹیکس دہندگان کے لیے انکم ٹیکس کی شرح کم کرنے کی تجویز دی گئی ہے، جس میں اضافی درمیانی سلیبز متعارف کروائی گئی ہیں۔
- سالانہ 22 لاکھ سے 32 لاکھ روپے کمانے والوں کے لیے مجوزہ ٹیکس 1,16,000 روپے جمع 22 لاکھ سے زائد رقم کا 20 فیصد ہوگا۔
- سالانہ 32 لاکھ سے 41 لاھ روپےمانے والوں کے لیے مجوزہ ٹیکس 3,16,000 روپے جمع 32 لاکھ سے زائد رقم کا 25 فیصد ہوگا۔
- سالانہ 41 لاکھ سے 56 لاکھ روپے کمانے والوں کے لیے مجوزہ ٹیکس 5,41,000 روپے جمع 41 لاکھ سے زائد رقم کا 29 فیصد ہوگا۔
- سالانہ 56 لاکھ سے 70 لاکھ روپے کمانے والوں کے لیے مجوزہ ٹیکس 9,76,000 روپے جمع 56 لاکھ سے زائد رقم کا 32 فیصد ہوگا۔
قومی اسمبلی میں شور شرابہ
بجٹ اجلاس کے دوران قومی اسمبلی میں شور شرابے کے مناظر دیکھنے میں آئے۔ اپوزیشن ارکان نے نعرے بازی کی، جبکہ حکومتی ارکان نے وزیراعظم شہباز شریف کے استقبال کے لیے ڈیسکیں بجائیں۔ کارروائی کے دوران پاکستان تحریک انصاف (پی ٹی آئی) کے ارکان قومی اسمبلی میں پلے کارڈز اور پوسٹرز بھی لائے۔
