جرمنی (اصل میڈیا ڈیسک) جرمنی میں پناہ گزینوں کی تنظیم نے وفاقی حکومت سے مطالبہ کیا ہے کہ افغان باشندوں کی ملک بدری کا سلسلہ ختم کر دیا جائے۔ تاہم جرمنی کے وائس چانسلر اولاف شُولس نے کہا ہے کہ اس بارے میں فیصلہ جرمن حکومت خود کرے گی۔
جرمنی میں پناہ گزینوں کے حقوق کے لیے سرگرم تنظیم نے وفاقی جرمن حکومت سے مطالبہ کیا ہے کہ افغانستان میں پھنسے ہوئے امدادی کارکنوں کو جرمنی بلانے کے لیے زیادہ چارٹر طیارے بھیجے جائیں۔ اُدھر افغان باشندوں کی جرمنی سے ملک بدری ختم کرنے کے بارے میں نائب چانسلر اولاف شُلس نے کہا ہے کہ اس کا فیصلہ جرمن حکومت خود کرے گی اور سنگین جرائم میں ملوث افراد کو جرمنی میں رہنے کی توقع نہیں کرنی چاہیے۔‘‘
جرمنی میں پناہ گزینوں کی تنظیم ” پرو ازیول‘‘ نے وفاقی جرمن حکومت سے مطالبہ کیا ہے کہ وہ افغانستان میں انتہائی خطرات سے دو چارسابق امدادی کارکنوں کو ہوائی جہاز کے ذریعے جلد سے جلد جرمنی پہنچانے کا بندوبست کرے۔ پناہ گزینوں کے حقوق کے لیے سرگرم تنظیم ” پرو ازیول‘‘ کے مینیجنگ ڈائرکٹر گؤنٹر بورکہارڈ نے منگل کو اخبار ‘رائنیشن پوسٹ‘ کو اس بارے میں ایک بیان دیتے ہوئے کہا،” کم از کم ایک ہزار کارکن افغانستان میں اب بھی موجود ہیں۔ ان کے انخلا کے لیے برلن حکومت کو فوری طور سے چارٹر ہوائی جہاز افغانستان بھیجنے چاہییں۔‘‘
گؤنٹر بورکہارڈ نے مزید کہا،” جرمن چانسلر انگیلا میرکل کو اپنے قول کو پورا کرنا ہوگا۔ ہمیں ان افراد کو افغانستان سے نکال کر محفوظ مقام تک پہنچانا ہوگا۔‘‘ انہوں نے یہ بیانات امریکی اقدامات کا حوالہ دیتے ہوئے کیا۔ واشنگٹن انتظامیہ اب تک متعدد سابق امریکی فوجی اہلکاروں اور مترجم کو طالبان کی جانب سے انتقامی کارروائیوں کے خدشات کی بنا پر امریکا بلا چُکی ہے۔
جرمنی میں ایک طرف افغانستان سے سابق امدادی کارکنوں کو جرمنی بلانے کا موضوع سیاسی سطح پر زور و شور سے زیر بحث ہے اور اس بارے میں برلن حکومت پر خاصا دباؤ ہے دوسری جانب جرمنی سے افغان باشندوں کی ملک بدری کے بارے میں بھی مختلف حلقوں کی طرف سے سوالات اُٹھائے جا رہے ہیں۔ یہ موضوع کافی حد تک جرمن سیاستدانوں کے درمیان رواں برس کے پارلیمانی انتخابات کی مہم میں بحث و مباحثے کا موضوع بنا ہوا ہے۔
افغان باشندوں کی ملک بدری کو ختم کر دینے کے موضوع پر پناہ گزینوں کے حقوق کے لیے سرگرم تنظیم ” پرو ازیول‘‘ کے مینیجنگ ڈائرکٹر گؤنٹر بورکہارڈ نے جرمن دفتر خارجہ کو کڑی تنقید کا نشانہ بنایا۔ وفاقی جرمن حکومت کے مطابق اب تک تقریباً ایک ہزار سات سو مقامی مدد گار اور ان کے اہل خانہ جرمنی آ چُکے ہیں جبکہ جرمنی آنے کے حقدار مزید 24 سو افراد کے ویزے جاری کر دیے گئے ہیں۔ تاہم گؤنٹر بورکہارڈ کا کہنا ہے کہ جرمن وزارت خارجہ اب تک افغانستان میں ان امدادی ورکرز کی اصل صورتحال کا اصل اندازہ نہیں لگا پائی ہے۔ ان کا کہنا تھا،” جرمن وزیر خارجہ ہائیکو ماس افغانستان کی حقیقی وحشیانہ صورتحال سے چشم پوشی کر رہے ہیں۔‘‘ گؤنٹر بورکہارڈ نے جرمنی سے افغان پناہ گزینوں کی ملک بدری کو فوری طور سے بند کرنے کا مطالبہ کیا ہے۔
افغان باشندوں کی ملک بدری پر عام پابندی کے مطالبے کے جواب میں نائب چانسلر اور سوشل ڈیمو کریٹک پارٹی کے آئندہ چانسلرشپ کے امیدوار اولاف شُلس کا کہنا تھا،” اس کا فیصلہ ہم کریں گے کہ کن افراد کو ملک بدر کیا جائے، سنگین جرائم کے مرتکب پناہ گزین ہمارے ہاں اور ہمارے ساتھ رہنے کی توقع نہیں کر سکتے۔‘‘ پناہ گزینوں کو کن ممالک واپس نہیں بھیجا جائے گا اس کا فیصلہ جرمن دفتر خارجہ کے پاس متعلقہ ممالک کی صورتحال کے بارے میں موجود رپورٹوں کی روشنی میں کیا جائے گا۔‘‘
